Аляксандр Лукашэнка не паедзе на першую сустрэчу Савета міру. Пра гэта заявіла яго прэс-сакратар Наталля Эйсмант. Яна патлумачыла адсутнасць Лукашэнкі пытаннямі, якія немагчыма адкласці, а таксама лагістычнымі цяжкасцямі, звязанымі з санкцыямі.
Нагадаем, раней СМІ паведамілі, што першая вочная сустрэча Савета міру, меркавана, можа адбыцца 19 лютага. Яна можа быць прысвечана збору сродкаў для сектара Газа. Паводле слоў Эйсмант, Лукашэнка атрымаў запрашэнне, аднак савет не ўпісаўся ў яго графік.
“Так, запрашэнне на першую сустрэчу лідараў у рамках Савета міру прэзідэнту Беларусі паступіла. На жаль, мы атрымалі яго позна, рабочы графік прэзідэнта на гэты перыяд ужо быў спланаваны. Так, мы з задавальненнем наведалі б Злучаныя Штаты Амерыкі, але ёсць пытанні, якія немагчыма адкласці”, – сказала яна.
Акрамя графіка, складанасці таксама ўяўляе лагістыка з-за ўведзеных санкцый.
“Акрамя таго, мы прымаем да ўвагі і магчымыя лагістычныя складанасці, якія могуць узнікнуць з-за незаконных санкцый, у першую чаргу Еўрасаюза — з улікам закрыцця паветранай прасторы над ЕС.
У гэтай сувязі і нягледзячы на наша жаданне, прэзідэнт у дадзеным мерапрыемстве прыняць удзел не зможа. Разам з тым падкрэслю: мы цалкам падзяляем нацэленасць прэзідэнта ЗША і Савета міру на вырашэнне ўсіх сусветных канфліктаў мірным шляхам”, – дадала Эйсмант.
Разам з тым Беларусь усё ж будзе прадстаўлена на першай сустрэчы Савета міру. Лукашэнку там заменіць міністр замежных спраў Максім Рыжанкоў.
“У Вашынгтоне прадстаўляць нашу краіну будзе міністр замежных спраў, які цалкам пагружаны ў тэматыку ўдзелу Рэспублікі Беларусь у Савеце міру і іншыя пытанні рэгіянальнай абстаноўкі і двухбаковых беларуска-амерыканскіх адносін. Амерыканскі бок ужо праінфармаваны аб гэтым рашэнні”, – дадала яна.
