Сёння на Нацыянальным прававым інтэрнэт-партале апублікаваны указ №22 ад 19 студзеня «Аб падтрымцы ГА „БРСМ“». Дакумент уступае ў сілу пасля апублікавання і распаўсюджвае сваё дзеянне на адносіны, якія ўзніклі з 1 студзеня.
Указам прадугледжана, што члены БРСМ, абраныя ў яго кіраўнічыя органы, уключаюцца ў склад калегій Міністэрства інфармацыі, Міністэрства культуры, Міністэрства адукацыі, Міністэрства сельскай гаспадаркі і харчавання, Міністэрства спорту, Міністэрства працы і сацыяльнай абароны.
Указам таксама прынята рашэнне аб фінансаванні БРСМ у 2026 годзе. Частка дадзенага пункта схаваная пад грыфам «для службовага карыстання». Падобная практыка ва ўказах аб падтрымцы БРСМ назіраецца з 2012 года. Акрамя таго, устаноўлена, што бягучае ўтрыманне тэрытарыяльных камітэтаў БРСМ будзе ажыццяўляцца за кошт сродкаў мясцовых бюджэтаў.
Таксама змены, схаваныя пад грыфам «для службовага карыстання», унесены ў Палажэнне аб парадку арганізацыі дзейнасці студэнцкіх атрадаў. Яны датычацца пункта палажэння, у якім вызначаўся парадак налічэння і выплаты ўзносаў у ФСЗН.
