Старшыня Дзяржкамваенпрама Дзмітрый Пантус праводзіць пераднавагодняе турнэ ў Расіі. Як паведамілі ў прэс-службе камітэта, ён правёў шэраг сустрэч за апошнія два дні.
У прыватнасці, Дзмітрый Пантус сустрэўся з генеральным дырэктарам ААТ «НПК „Уралвагонзавод“» Аляксандрам Патапавым.
«У ходзе сустрэчы разгледжаны пытанні бягучага ўзаемадзеяння і ўзгоднены планы сумесных работ у напрамку бранятанкавай тэхнікі на бліжэйшую перспектыву паміж Рэспублікай Беларусь і Расійскай Федэрацыяй», — пракаментавалі перамовы ў камітэце.
Яшчэ адна сустрэча адбылася з генеральным дырэктарам ААТ «Рособоронэкспорт» Аляксандрам Міхеевым. Бакі падвялі папярэднія вынікі сумеснай працы ў адыходзячым 2025 годзе. Быў адзначаны высокі ўзровень узаемадзеяння, у тым ліку пры рэалізацыі праектаў у інтарэсах трэціх краін. Абмяркоўваліся перспектыўныя напрамкі ўзаемадзеяння на бліжэйшую будучыню, а таксама практычныя механізмы далейшага паглыблення вытворчай і тэхналагічнай кааперацыі. Па выніках перамоваў быў падпісаны шэраг кантрактаў.
Сёння Пантус працягнуў сустрэчай у Міністэрстве прамысловасці і гандлю РФ. Ён правёў перамовы з першым намеснікам міністра Кірылам Лысагорскім і намеснікам міністра Генадзем Абраменкавым.
«У ходзе сустрэчы бакі падрабязна абмеркавалі ход рэалізацыі шэрагу значных сумесных праектаў, актуальныя пытанні паглыблення кааперацыі паміж беларускімі і расійскімі прадпрыемствамі, а таксама перспектыўныя напрамкі двухбаковага супрацоўніцтва на 2026 год і канкрэтныя алгарытмы іх практычнай рэалізацыі.
Перамовы прайшлі канструктыўна, у атмасферы ўзаемаразумення і былі накіраваныя на далейшую інтэграцыю і ўмацаванне прамысловага комплексу Саюзнай дзяржавы», — расказалі ў Дзяржкамваенпраме.
