Залёты метэазондаў з кантрабандай з Беларусі — частка гібрыдных дзеянняў. Пра гэта заявіў на прэс-канферэнцыі віцэ-прэм’ер, міністр абароны Польшчы Уладзіслаў Касіняк-Камыш.
«Мэта падвойная. Мэта правакацыйна-кантрабандная. Гэта гібрыдная вайна, якая, з аднаго боку, аб’ядноўвае заробак для пэўнай групы, якая, верагодна, атрымала канцэсію на кантрабанду з боку беларускіх службаў, а з другога боку, спрабуе дэстабілізаваць сітуацыю і сеяць беспарадкі», — сказаў ён.
Міністр таксама адзначыў, што польскія памежнікі і паліцыя эфектыўна перахопліваюць кантрабанду і затрымліваюць кантрабандыстаў. Ён таксама звярнуў увагу на тое, што паветраная кантрабанда наносіла большы ўрон Літве з-за парушэння палётаў у аэрапорце Вільнюса.
«За мінулы тыдзень паліцыя і памежная служба дасягнулі вельмі ўражлівых вынікаў, за што мы ім вельмі ўдзячныя, а вайскоўцы вядуць улік і маніторынг усяго, што адбываецца. Характар гэтых дзеянняў падвойны: кантрабанда і правакацыя», — дадаў ён.
Сёння камандаванне Узброеных сіл Польшчы зноў паведаміла пра парушэнне паветранай прасторы метэазондамі з кантрабандай. Паліцыя і памежнікі пакуль не паведамлялі пра іх выяўленне на зямлі. У лютым інцыдэнты з паветранымі шарамі ў Польшчы адбываюцца даволі часта.
