Каля пункта пропуску «Брэст» афіцыйна адкрылася рэканструяваная зона чакання, паведамляе прэс-служба беларускага Дзяржаўнага мытнага камітэта. Пляцоўка разлічана на размяшчэнне каля 370 транспартных сродкаў.
Да рэканструкцыі зона змяшчала 84 машына-месцы. Плошча павялічана на 2,3 гектара, колькасць стаяначных месцаў вырасла ў 4 разы — дададзены 235 месцаў для легкавога транспарту і 50 для аўтобусаў.
Пляцоўка абсталявана зараднымі станцыямі для электрамабіляў, сістэмай аўтаматычнага распазнавання рэгістрацыйных знакаў, аб’ектамі прыдарожнага сэрвісу, санітарнымі блокамі і зонамі адпачынку. Па ўсёй тэрыторыі размешчаны 17 электронных табло, якія дублююць выклік транспартнага сродку да пункта пропуску.
Старшыня ДМК Уладзімір Арлоўскі адзначыў, што «Брэст» застаецца самым загружаным пунктам пропуску ў напрамку Еўрасаюза. Паводле яго слоў, рэалізаваны праект накіраваны на павышэнне камфорту, бяспекі і хуткасці перасячэння мяжы.
У цырымоніі адкрыцця прынялі ўдзел старшыня Брэсцкага аблвыканкама Пётр Пархомчык, памочнік прэзідэнта — інспектар па Брэсцкай вобласці Аляксандр Ломскі, старшыня ДМК Уладзімір Арлоўскі і прадстаўнікі мясцовых уладаў.
