Ірак дамагаецца павышэння сваёй квоты ў АПЕК. Калі жаданне Багдада не будзе задаволена, могуць быць разгледжаны розныя меры, у тым ліку выхад краіны з АПЕК. Пра гэта паведамляе Reuters са спасылкай на крыніцы.
Раней сёлета АПЕК пакінулі Аб’яднаныя Арабскія Эміраты. Ірак цяпер з’яўляецца другім па аб’ёмах здабычы ўдзельнікам арганізацыі. Таксама ён быў сярод яе заснавальнікаў.
Асноўным планам Ірака застаецца захаванне сяброўства ў арганізацыі пры павелічэнні квоты здабычы.
«Саудаўская Аравія і іншыя саюзнікі па АПЕК павінны паставіцца да гэтага пытання з максімальнай сур’ёзнасцю. У адваротным выпадку Ірак будзе вымушаны разгледзець усе даступныя варыянты», — сказаў суразмоўца агенцтва.
Цяпер квота Ірака ў рамках дэкларацыі аб супрацоўніцтве АПЕК+ складае амаль 4,4 млн барэляў за суткі. Краіна імкнецца павялічыць сваю здабычу ў найбліжэйшыя гады да 7 млн барэляў за суткі.
