Дэлегацыя ПАТ «Газпрам» на чале з намеснікам старшыні праўлення кампаніі Віталіем Маркелавым знаходзіцца з візітам у Беларусі. Члены дэлегацыі наведалі Мінск і Жлобін і правялі нараду з удзелам віцэ-прэм’ера Віктара Каранкевіча, паведамляе прэс-служба беларускага ўрада.
Прадстаўнікі «Газпрама» азнаёміліся з магутнасцямі ААТ «БЕЛАЗ» у Жодзіне, праявіўшы асаблівую цікавасць да магчымасці выпуску кар’ернай тэхнікі, у тым ліку на звадкаваным прыродным газе. Дэлегацыя таксама наведала ААТ «МАЗ», дзе ёй прадставілі актуальны мадэльны шэраг газаматорнай тэхнікі і перспектыўныя распрацоўкі прадпрыемства.
На нарадзе з удзелам Віктара Каранкевіча, Віталія Маркелава і кіраўнікоў беларускіх прадпрыемстваў быў разгледжаны шырокі круг пытанняў вытворчай кааперацыі.
«Наша ўзаемадзеянне ў апошнія гады пасля падпісання Мемарандума аб супрацоўніцтве ў межах Пецярбургскага міжнароднага эканамічнага форуму ўжо дае свае вынікі. Асноўным рынкам спажывання беларускай тэхнікі, якая працуе на газавым паліве, з’яўляецца Расійская Федэрацыя. І ў гэтай сувязі развіццё супрацоўніцтва з ПАТ «Газпрам» для нас з’яўляецца стратэгічным напрамкам узаемадзеяння і для беларускіх прадпрыемстваў, і ў цэлым для Рэспублікі Беларусь», — заявіў Каранкевіч.
На нарадзе абмяркоўваліся перспектывы паставак беларускай прадукцыі для патрэб даччыных таварыстваў «Газпрама». Гаворка ішла пра электратэхнічнае абсталяванне ААТ «МЭТЗ ім. В.І. Казлова», спецыяльную дарожна-будаўнічую тэхніку холдынга «АМКОДОР», газаматорныя экскаватары-планіроўшчыкі СП «СВЯТОВИТ», а таксама оптыка-электронныя сістэмы ААТ «Пеленг».
«Сёння беларускія прадпрыемствы ўдзельнічаюць у праектах «Газпрама» не толькі ў сегменце газаматорнай тэхнікі і ў галіне спецыялізаванага машынабудавання і прыборабудавання», — адзначыў Маркелаў.
Таксама абмяркоўвалася падрыхтоўка да Пецярбургскага міжнароднага газавага форуму-2026. Беларускія прадпрыемствы выказалі гатоўнасць прыняць актыўны ўдзел у выставачнай і дзелавой праграмах форуму.
