Генеральная пракуратура накіравала ў суд крымінальную справу ў дачыненні да генеральнага дырэктара аднаго з буйных мясакамбінатаў Брэсцкай вобласці і кіраўніка прыватнага суб’екта гаспадарання. Яны абвінавачваюцца ў атрыманні і дачы хабару.
Паводле версіі абвінавачання, незаконныя ўзнагароджанні прызначаліся за пастаўкі харчовых дабавак.
“Паводле матэрыялаў справы кіраўнік мясакамбіната з красавіка 2024 года па красавік 2025 года атрымаў у некалькі этапаў падчас службовых камандзіровак у Мінск і Маскву ад кіраўніка прыватнай кампаніі, зацікаўленага ў яго лаяльнасці і прыхільнасці, больш за 8,8 тыс. еўра”, – гаворыцца ў паведамленні.
Адзначаецца, што хабар перадаваўся ў нумарах гасцініц і рэстаранах. Даўца хабару чыстасардэчна раскаяўся ў здзейсненым. Накладзены арышт на маёмасць абвінавачаных на суму больш за 200 тыс. рублёў.
Атрымальнік хабару знаходзіцца пад вартай, а даўца хабару — пад падпіскай аб нявыездзе.