Святлана Ціханоўская вітала сённяшняе рашэнне ЕС аб пашырэнні санкцыйных крытэрыяў у дачыненні да беларускіх уладаў.
“Я вітаю сённяшняе рашэнне міністраў замежных спраў Еўрапейскага Саюза ў Бруселі аб пашырэнні санкцыйнага рэжыму ЕС супраць Беларусі.
Дадаўшы крытэрыі, прапанаваныя Літвой, для гібрыдных атак, дэзінфармацыі і парушэння працы крытычнай інфраструктуры, ЕС узмацняе сваю здольнасць рэагаваць на злоўжыванні рэжыму з дапамогай дадатковых індывідуальных і сектаральных санкцый.
Ціск працуе — і ён павінен працягвацца”, — заявіла яна.
Нагадаем, сёння ў Еўрапейскім Саюзе былі зацверджаны новыя крытэрыі, у адпаведнасці з якімі могуць уводзіцца санкцыі ў дачыненні да беларускіх фізічных і юрыдычных асоб. Пашырэнне санкцыйных крытэрыяў было ініцыявана Літвой у адказ на парушэнні паветранай прасторы метэазондамі кантрабандыстаў, якія залятаюць з тэрыторыі Беларусі.
Трэба адзначыць, што хоць у ЕС і зацвердзілі новыя крытэрыі, канкрэтныя санкцыі пакуль у адпаведнасці з імі не ўводзіліся.
