Рада ЕС ухваліла новыя крытэрыі для ўвядзення санкцый у дачыненні да Беларусі. Рашэнне з’яўляецца адказам на залёты метэазондаў кантрабандыстаў у паветраную прастору Літвы.
“Новыя крытэрыі дазволяць ЕС уводзіць абмежавальныя меры супраць тых, хто плануе, кіруе, падтрымлівае або спрыяе маніпуляванню замежнай інфармацыяй і ўмяшанню ў яе. Больш за тое, ЕС зможа прымяняць санкцыі да фізічных і юрыдычных асоб, якія ўдзельнічаюць у дзеяннях, накіраваных супраць функцыянавання дэмакратычных інстытутаў, эканамічнай дзейнасці або паслуг, што ўяўляюць грамадскі інтарэс для ЕС і яго дзяржаў-членаў. ЕС таксама зможа спыняць несанкцыянаванае пранікненне на тэрыторыю дзяржавы-члена.
Нарэшце, новы крытэрый таксама ахоплівае дзеянні, накіраваныя на ўмяшанне ў працу, пашкоджанне або знішчэнне крытычнай інфраструктуры, а таксама шырокамаштабныя або сістэматычныя дзеянні, якія прыводзяць да парушэння функцыянавання такой інфраструктуры”, — гаворыцца ў паведамленні прэс-службы Еўрасавета.
Адзначаецца, што ў сваіх высновах ад 23 кастрычніка Рада ЕС асудзіла актывізацыю гібрыдных атак з боку Расіі і Беларусі, а таксама парушэнні паветранай прасторы ЕС. У канцы кастрычніка вярхоўная прадстаўніца ЕС па замежных справах і палітыцы бяспекі Кая Калас асудзіла правакацыі супраць краін ЕС.
Адзначаецца, што метэазонды, якія запускаюцца з Беларусі, могуць несці да 50 кг нагрузкі, лётаць на вышыні 8–15 км з хуткасцю да 100–200 км/г. Яны ствараюць “пагрозы бяспецы, перш за ўсё для грамадзянскай авіяцыі”.
“Гэтыя ўварванні ў паветраную прастору Літвы парушылі сотні рэйсаў і нанеслі істотную шкоду авіякампаніям, тысячам падарожнікаў і дзяржаўным органам. Іх мэта — дэстабілізаваць дзяржаву-члена ЕС і запалохаць еўрапейскіх грамадзян праз прамыя пагрозы грамадзянскай авіяцыі. Выкарыстанне гэтых аэрастатаў адбываецца ў кантэксце больш шырокай мэтанакіраванай гібрыднай кампаніі, разам з іншымі дзеяннямі, якія таксама ўключаюць спансаваную дзяржавай кантрабанду мігрантаў”, — гаворыцца ў паведамленні.
Рашэнне аб увядзенні санкцый у адпаведнасці з новым крытэрыем пакуль яшчэ не прымалася.
