Святлана Ціханоўская ў Эстонскім доме ў Стакгольме 11 мая ўручыла медалі Аб’яднанага пераходнага кабінета Беларусі чатыром лаўрэатам. Рашэнні аб узнагароджанні былі прынятыя кабінетам у 2025 годзе.
Медалём «За плённую працу на карысць Беларусі» за культурны дыялог, падтрымку і салідарнасць з беларускім народам узнагароджаныя Тааве Сёт Вахермягі — кіраўнік Эстонскага дома ў Стакгольме, шматгадовы арганізатар культурных і грамадскіх ініцыятыў, і Сірле Сёт, старшыня Саюза эстонцаў у Швецыі і сасукіраўніца Эстонскага дома, якая актыўна падтрымлівае беларускі парадак дня і дапамагае з правядзеннем беларускіх мерапрыемстваў.
Таксама гэтым медалём за годнае садзейнічанне ў грамадскай і прафесійнай дзейнасці адзначаная Марыя Сёдэрберг — шведская фотажурналістка і пісьменніца, былая кіраўніца таварыства «Беларусь» у Швецыі, якая прысвяціла прафесійную дзейнасць асвятленню канфліктаў у аўтарытарных краінах, у тым ліку ў Беларусі.
Медаль Францыска Скарыны за адданасць інтарэсам беларускага народа, папулярызацыю гісторыі і культуры Беларусі і актыўны ўдзел у жыцці дыяспары прысуджаная гісторыку Андрэю Катлярчуку, выкладчыку кафедры гісторыі Стакгольмскага ўніверсітэта і старшаму навуковаму супрацоўніку Універсітэта Паўднёвага Стакгольма. Узнагарода перададзеная лаўрэату праз прадстаўніка Народнай амбасады ў Швецыі Дзмітрыя Васермана.
