Кіраўніца Аб’яднанага пераходнага кабінета Святлана Ціханоўская разам з прэзідэнтамі Літвы Гітанасам Наўседам, Польшчы Каралем Наўроцкім і Украіны Уладзімірам Зяленскім ушанавалі памяць удзельнікаў паўстання 1863–1864 гадоў на віленскіх могілках Росы.
У межах урачыстасцяў лідарка дэмсіл таксама прысутнічала на памятным богаслужэнні ў Віленскім кафедральным саборы. Пасля службы ўдзельнікі накіраваліся на могілкі Росы, дзе ўсклалі вянкі ў памяць пра тых, хто змагаўся супраць імперскага гвалту. У мерапрыемствах удзельнічалі дарадцы Святланы Ціханоўскай Франак Вячорка і Дзяніс Кучынскі, а таксама прадстаўнікі беларускай супольнасці Вільні.
Ціханоўская выказала падзяку ўсім беларусам, якія прыйшлі ўшанаваць памяць паўстанцаў.
«Дзякую кожнаму, хто прыйшоў сёння на гэтыя ўрачыстасці. Ваша прысутнасць — гэта знак таго, што памяць пра барацьбу за свабоду жыве ў сэрцах беларусаў незалежна ад месца, дзе мы знаходзімся.
Памяць пра паўстанне 1863–1864 гадоў застаецца актуальнай і сёння, калі беларусы працягваюць барацьбу за свабоду, незалежнасць і дэмакратычную будучыню сваёй краіны. Спадчына Кастуся Каліноўскага нагадвае, што барацьба за годнасць і правы чалавека — гэта агульная каштоўнасць, якая аб’ядноўвае пакаленні», — прыводзіць яе словы прэс-служба.
