Святлана Ціханоўская сустрэлася з генеральным дырэктарам польскага банка PKO Шымонам Мідэрам на палях Сусветнага эканамічнага форуму ў Давосе. Бакі абмеркавалі праблемы, з якімі сутыкаюцца грамадзяне Беларусі пры адкрыцці рахункаў, паведамляе Офіс Ціханоўскай.
Мідэра заявіў, што банк заўсёды імкнецца падтрымліваць беларусаў, а існуючыя абмежаванні звязаныя не з палітыкай банка, а з новымі рэгуляцыямі Еўрасаюза ў сувязі з вайной, якія накіраваныя на закрыццё лазеек для абыходу санкцый супраць Беларусі і Расіі.
Бакі абмеркавалі праблемы з адкрыццём рахункаў для беларусаў, у якіх пакуль няма віду на жыхарства або дазволу на працу ў Польшчы, або ў якіх пратэрмінаваныя пашпарты. Ціханоўская прапанавала ўвесці выключэнні для беларусаў, што патрабуе дадатковых кансультацый з еўрапейскімі рэгулятарамі. Таксама абмяркоўваліся магчымасці падтрымкі малога беларускага бізнесу і правядзенне сумесных мерапрыемстваў.
«Мы абмеркавалі вострыя праблемы, з якімі сутыкнуліся тысячы беларусаў у Польшчы. Спадар Мідэра цудоўна разумее, што гаворка ідзе пра людзей, якія легальна жывуць у Польшчы, плацяць падаткі, ствараюць бізнес і ўносяць уклад у эканоміку. Для іх жыцця неабходныя зразумелыя, празрыстыя і бяспечныя правілы. Менавіта такія рашэнні абараняюць і банкі, і людзей, і ўмацоўваюць еўрапейскую салідарнасць у той час, калі Беларусь змагаецца за свабоду і незалежнасць», — заявіла Ціханоўская.
