Фонд BYSOL запускае экстраны збор для дапамогі беларускім палітвязням, вызваленым сёння.
Поўны спіс вызваленых на дадзены момант невядомы.
Сума збору — 100 тысяч еўра. Збор і выплаты ажыццяўляюцца ў межах праграмы BYSOL па падтрымцы палітвязняў. Праграма прадугледжвае дапамогу ў памеры 1000 еўра. Калі будзе сабрана сума большая за заяўленую мэту, усе сродкі будуць размеркаваны паміж вызваленымі.
Каб атрымаць дапамогу, зняволеным з групы вызваленых 19 сакавіка трэба адпавядаць двум крытэрыям: мець досвед пераследу па палітычных матывах і даць згоду (або звярнуцца) на атрыманне такой дапамогі да 31 жніўня 2026 года ўключна. BYSOL прымае такія заяўкі праз кантакт у Telegram: @bysol_pzk.
«Мы разлічваем і спадзяёмся, што да збору далучацца неабыякавыя людзі. Кожны ўнёсак вельмі важны. Такая дапамога дае надзею, падтрымку і, натуральна, магчымасць закрыць самыя тэрміновыя патрэбы — такія як лекі, адзенне, харчаванне. Мы ўпэўненыя, што мець уласныя грошы і распараджацца імі годна, у адпаведнасці са сваімі прыярытэтамі, — вельмі важны момант для кожнага вызваленага», — заявіў дырэктар BYSOL Віталіюс Моцкус.
Нагадаем, сёння ў Мінску прайшлі перамовы Аляксандра Лукашэнкі і спецпасланніка прэзідэнта ЗША Джона Коўла. Лукашэнка заявіў, што гатовы прытрымлівацца дамоўленасцяў з ЗША па палітвязнях.
