Беларусь разлічвае аднавіць тры сумесныя вытворчасці ў Венесуэле. Пра гэта ў інтэрв’ю беларускаму тэлебачанню расказаў пасол нашай краіны ў Каракасе Дзмітрый Дзеравінскі.
«У цяперашні час вядзецца работа па аднаўленні дзейнасці гэтых сумесных зборачных вытворчасцяў. Варта прызнаць, што гэта сапраўды флагманы, у тым ліку і для Венесуэлы, і, наколькі я змог пераканацца, такога кластара прамысловай прадукцыі, напэўна, ва ўсім рэгіёне і не існуе. Гэта значыць, для Венесуэлы гэтыя прадпрыемствы маюць вялікае значэнне ў сілу ўсіх гэтых негатыўных фактараў, якія наклаліся на сітуацыю: і санкцыйнай палітыкі, і вымушанай пераарыентацыі сродкаў на вырашэнне іншых пытанняў, у тым ліку звязаных з наступствамі пандэміі і гэтак далей.
Прадпрыемствы прыпынілі сваю дзейнасць і не выпускалі прадукцыю. Гэта значыць, падтрымлівалася іх функцыянаванне, іх працаздольнасць, але без актыўнай вытворчай дзейнасці. У цяперашні час якраз вядзецца работа па, як я ўжо сказаў, аднаўленні іх дзейнасці», — сказаў ён.
Паводле яго слоў, у Беларусь ужо прыязджалі прадстаўнікі венесуэльскага міністэрства, вядзецца падрыхтоўка да заключэння кантрактаў.
«Быў арганізаваны візіт намесніка міністра прамысловасці Венесуэлы сюды, у Рэспубліку Беларусь, і візіт быў падабраны такім чынам, каб ён змог таксама наведаць выставу “Белагра”, дзе прадстаўлена шырокая гама розных відаў сельскагаспадарчай тэхнікі. Па выніках гэтага візіту бакам удалося выйсці на канкрэтныя дамоўленасці, у тым ліку па пытанні аднаўлення дзейнасці на сумесным прадпрыемстве па зборцы трактароў, на сумесным прадпрыемстве па зборцы аўтамабіляў МАЗ.
Таксама венесуэльскі бок зацікавіла магчымасць рэанімаваць вытворчую дзейнасць на трэцім прадпрыемстве, якое таксама пабудавана ў Баррылосе. Першапачаткова яно было прызначана для вытворчасці розных відаў тэхнікі “Амкадор”, у свой час выпускала дызель-генератары, і ў дадзены момант венесуэльскі бок, у тым ліку, зацікавіла і тэхніка БелАЗ, і лесанарыхтоўчая тэхніка “Амкадор”. І цяпер якраз вядуцца тэхнічныя перамовы для таго, каб усе гэтыя задумы і дамоўленасці ператварыць ужо ў канкрэтнае пагадненне, у канкрэтны кантракт», — заключыў Дзеравінскі.
