У Магілёўскай вобласці зафіксаваны 4 выпадкі гібелі ад вострага атручвання алкаголем з анамальна высокай канцэнтрацыяй этылавага спірту ў крыві, паведамілі ў Дзяржаўным камітэце судовых экспертыз.
У канцы студзеня бацька выявіў мёртвым у кватэры свайго 45-гадовага сына-магілёўца. Судова-медыцынская экспертыза ўстанавіла, што смерць наступіла ад вострага атручвання этылавым спіртам — яго канцэнтрацыя ў крыві склала 5,3 праміле.
У сярэдзіне лютага ў Асіповічах работнікі выявілі цела 52-гадовага мужчыны на падлозе вагона пасажырскага цягніка на чыгуначным вакзале. Судова-медыцынскі эксперт устанавіў канцэнтрацыю алкаголю ў крыві загінулага на ўзроўні 5,1 праміле.
У Горках жанчына выявіла дома цела сваёй 46-гадовай сястры — канцэнтрацыя алкаголю склала 5,2 праміле. Праз два тыдні там жа загінуў 38-гадовы мужчына з канцэнтрацыяй алкаголю ў крыві 5,9 праміле.
Судовыя эксперты нагадалі, што для большасці людзей смяротным можа стаць ужыванне 200–300 мілілітраў чыстага этанолу. У пераліку на моцны алкаголь гэта каля 600–760 мілілітраў, а канцэнтрацыя 5 праміле ў крыві адпавядае прыкладна аднаму літру выпітага 40-градуснага алкаголю.