Грамадзян Беларусі затрымалі ў Германіі за працу без дазволу.
23 красавіка супрацоўнікі падраздзялення фінансавага кантролю па барацьбе з нелегальнай занятасцю Галоўнага мытнага ўпраўлення Франкфурта-на-Одэры прыйшлі з праверкай на будаўнічую пляцоўку парка сонечных батарэй. Падчас праверкі высветлілася, што 61 іншаземец працуе на будоўлі з парушэннем міграцыйнага заканадаўства, паведамляе presseportal.
Парушэнні былі знойдзены ў работнікаў з 10 краін, у тым ліку з Беларусі, Польшчы, Украіны, Малдовы, Узбекістана. У іх не было нямецкага віду на жыхарства, а іх усходнееўрапейскія ВНЖ не давалі права працаваць у Германіі.
Падраздзяленне фінансавага кантролю па барацьбе з нелегальнай занятасцю збіраецца правесці паглыбленыя праверкі і расследаванні кантрактаў усіх субпадрадных кампаній, занятых на будоўлі.
