Беларусь і Тога падпісалі пагадненне аб адмене віз для ўладальнікаў дыпламатычных і службовых пашпартоў. Свае подпісы пад ім паставілі міністр замежных спраў Максім Рыжанкоў і міністр замежных спраў, супрацоўніцтва, афрыканскай інтэграцыі і па справах тагалезцаў за мяжой Тога Робер Дзюссэ.
Як паведамілі ў МЗС, таксама падпісаны мемарандум аб узаемаразуменні паміж міністэрствамі замежных спраў дзвюх краін аб правядзенні палітычных кансультацый.
У беларускую дэлегацыю ўвайшлі прадстаўнікі міністэрстваў прамысловасці і сельскай гаспадаркі.
Падчас перамоў Рыжанкоў і Дзюссэ абмеркавалі перспектывы двухбаковых адносін, дамовіліся актывізаваць супрацоўніцтва. Беларусь разглядае Тога сярод прыярытэтных партнёраў на афрыканскім кантыненце і як важны лагістычны хаб для выхаду на рынкі краін Сахеля.
Бакі абазначылі першачарговыя задачы, сярод якіх падрыхтоўка пагадненняў аб пазбяганні двайнога падаткаабкладання і аб абароне інвестыцый, а таксама распрацоўка «дарожнай карты» супрацоўніцтва. Беларускі бок перадаў тагалезскаму праекты трох пагадненняў паміж гандлёва-прамысловымі палатамі, у галінах сельскай гаспадаркі і экспартнага крэдытавання.
Таксама ішла гаворка аб узаемадзеянні ў гуманітарнай і навукова-тэхнічнай сферах, найперш у галіне адукацыі і высокіх тэхналогій. Максім Рыжанкоў распавёў пра магчымасці беларускай адукацыі, дзейнасць ПВТ і патэнцыял Акадэміі навук.
Рыжанкоў запрасіў Дзюссэ наведаць Беларусь.
Таксама беларускі міністр сустрэўся з кіраўніком Савета міністраў Тога Фор Эссозімна Гнасінгбэ. Ён перадаў яму запрашэнне наведаць Беларусь ад Аляксандра Лукашэнкі. Адзначаецца, што запрашэнне было прынята з удзячнасцю, а тэрміны візіту будуць узгоднены па дыпламатычных каналах.
Праграму візіту працягнулі перамовы з міністрам сельскай гаспадаркі, рыбалоўства, жывёлагадоўлі і харчовага суверэнітэту Тога Антуанам Лекуа Гбегбені. Дасягнута дамоўленасць аб выпрацоўцы канкрэтнага алгарытму, накіраванага на забеспячэнне доступу беларускай харчовай прадукцыі на рынак Тога. Былі прапанаваны комплексныя рашэнні ў сферы механізацыі сельскай гаспадаркі.
“У завяршэнне сустрэчы быў завершаны працэс атрымання сертыфікатаў адпаведнасці для доступу беларускай харчовай прадукцыі ў Тога. Беларускі бок перадаў тагалезскім калегам падрабязныя інфармацыйныя матэрыялы для далейшага вывучэння з мэтай пераходу дасягнутых дамоўленасцяў у практычную плоскасць”, – распавялі ў МЗС.
Таксама ўчора Максім Рыжанкоў наведаў аўтобусны парк у Ламэ, дзе працуе айчынная тэхніка.
