Амерыканская разведка сёлета перагледзела сваю ацэнку верагоднасці «абмежаванага нападу» або іншых падобных акцый Расіі супраць адной з краін НАТА.
Як піша The Wall Street Journal, раней у ЗША лічылі, што Пуцін не будзе правакаваць краіну — удзельніцу Паўночнаатлантычнага дагавора, пакуль ён працягвае баявыя дзеянні ва Украіне. Аднак, паводле слоў амерыканскіх чыноўнікаў, у пачатку гэтага года ацэнка змянілася.
Мэтай Пуціна пры такім нападзе будзе раскол НАТА, у тым ліку праверка рэакцыі ЗША.
Паводле інфармацыі выдання, магчымыя пагрозы вар’іруюцца ад кібератак або адпраўкі неапазнаных узброеных груп да абмежаванага ўварвання на ўсходні фланг альянсу. Паводле ацэнак амерыканскай разведкі, любыя дзеянні Расіі могуць адбыцца ў перыяд з восені гэтага года па 2029 год.
Верагоднасць абмежаванага ўварвання ацэньваецца як нізкая, паколькі яно можа сутыкнуцца з наступствамі рэалізацыі артыкула 5 статута НАТА аб калектыўнай абароне. Аднак гэты артыкул не так дакладна вызначае рэакцыю на кіберпагрозы або гібрыдныя дзеянні.
WSJ таксама звяртае ўвагу на інфармацыю аб скарачэнні запасаў некаторых крытычна важных боепрыпасаў, якая ў апошнія дні цыркулюе ў прэсе.
