Прэзідэнт Украіны Уладзімір Зяленскі заявіў, што Кіеў рыхтуе санкцыі ў дачыненні да асоб, звязаных з пастаўкамі збожжа ў Ізраіль з акупаваных Расіяй тэрыторый Украіны.
“Скупка скрадзенага ва ўсіх нармальных краінах з’яўляецца дзеяннем, якое цягне юрыдычную адказнасць. Гэта датычыцца, у прыватнасці, і скрадзенага Расіяй збожжа. Яшчэ адно судна з такім збожжам прыбыло ў порт Ізраіля і рыхтуецца да выгрузкі. Гэта не з’яўляецца і не можа быць чыстым бізнесам. Улады Ізраіля не могуць не ведаць, якія судны і з якім грузам прыбываюць у парты краіны.
Расія сістэматычна забірае збожжа на часова акупаванай украінскай зямлі і арганізуе вываз такога збожжа асобамі, звязанымі з акупантамі. Такія здзелкі парушаюць заканадаўства самой дзяржавы Ізраіль”, — гаворыцца ў апублікаванай заяве Зяленскага.
Ён адзначыў, што Украіна прадпрыняла па дыпламатычных каналах усе неабходныя крокі, каб выключыць падобныя інцыдэнты. Паводле яго слоў, ён даручыў МЗС Украіны праінфармаваць усіх партнёраў пра сітуацыю з новым суднам.
“Украіна на аснове інфармацыі ад нашых разведак рыхтуе адпаведны санкцыйны пакет, які будзе ахопліваць і тых, хто непасрэдна перавозіць гэтае збожжа, і тых фізічных і юрыдычных асоб, якія спрабуюць зарабляць на такой крымінальнай схеме. Скаардынуем і з еўрапейскімі партнёрамі, каб адпаведныя асобы былі ўключаны ў санкцыйныя рэжымы”, — дадаў Зяленскі.
Прэзідэнт Украіны спадзяецца, што ўлады Ізраіля не будуць аслабляць двухбаковыя адносіны.
“Украіна разлічвае на партнёрскія адносіны і ўзаемную павагу з кожнай дзяржавай. Мы рэальна працуем на тое, каб бяспекі, у тым ліку і ў рэгіёне Блізкага Усходу, было больш. Чакаем, што ўлады Ізраіля будуць паважаць Украіну і не будуць рабіць крокаў, якія аслабляюць двухбаковыя адносіны”, — заключыў ён.
