Прэзідэнт Украіны Уладзімір Зяленскі адрэагаваў на прапанову Уладзіміра Пуціна аб перамір’і на 9 мая і даручыў сваёй камандзе ўдакладніць дэталі ў ЗША.
«Даручыў нашым прадстаўнікам звязацца з камандай Прэзідэнта Злучаных Штатаў і высветліць дэталі расійскай прапановы аб кароткатэрміновай цішыні. Украіна імкнецца да міру і забяспечвае неабходную дыпламатычную працу для рэальнага заканчэння гэтай вайны. Высветлім, пра што канкрэтна ідзе гаворка: пра некалькі гадзін бяспекі для парада ў Маскве або пра нешта большае», — заявіў Зяленскі.
Паводле слоў Зяленскага, Украіна гатова да спынення агню на працяглы тэрмін.
«Наша прапанова — спыніць агонь на доўгатэрміновай аснове, гарантаваць надзейную бяспеку для людзей і доўгатэрміновы мір. Украіна гатова працаваць дзеля гэтага ў любым годным і эфектыўным фармаце», — сказаў прэзідэнт Украіны.
Нагадаем, 29 красавіка адбылася тэлефонная размова Уладзіміра Пуціна і Дональда Трампа. Расійскі бок прапанаваў абвясціць перамір’е «на перыяд святкавання Дня Перамогі».
