Суд Аршанскага раёна і Оршы прысудзіў 23-гадовага замежніка да 14 гадоў калоніі і штрафу за перамяшчэнне наркотыкаў праз мяжу. Грамадзянства абвінавачанага не называецца.
Згодна з матэрыяламі справы, у кастрычніку 2025 года абвінавачаны працаваў у наркакраме ў суседняй краіне. Паводле ўказання куратара ён забраў з тайнікоў амаль 6 кг альфа-PVP на тэрыторыі суседняй дзяржавы і за некалькі разоў перавёз наркотыкі ў Беларусь. Для транспартавання ён выкарыстаў аўтамабіль Skoda Rapid, уладальнік якога не ведаў пра злачынную схему.
Каля 1 кг псіхатропу абвінавачаны схаваў у тайніку ў Полацкім раёне, а каардынаты перадаў іншым удзельнікам групы для дробнааптовага збыту.
Маладога чалавека затрымалі ў Аршанскім раёне. У яго аўтамабілі знайшлі астатнія амаль 5 кг псіхатропу, паведамляе пракуратура Віцебскай вобласці.
Суд прысудзіў замежніка да 14 гадоў пазбаўлення волі і штрафу ў памеры 6750 рублёў. Тры мабільныя тэлефоны абвінавачанага канфіскаваныя. Таксама з яго спагнана больш за 3 тысячы рублёў — грашовая сума, якая адпавядае кошту маёмасці, здабытай злачынным шляхам.