Супрацоўнікі Вільнюскай тэрытарыяльнай мытні 10 лютага затрымалі чарговую партыю кантрабандных цыгарэт. На гэты раз 2500 пачкаў былі выяўлены ў пасажырскім аўтобусе, які ўехаў з Беларусі праз памежны пункт Мядзінінкай.
Вадзіцелі аўтобуса Yutong — абодва грамадзяне Беларусі — заявілі, што не перавозяць забароненыя тавары. Аднак мытнікі звярнулі ўвагу, што ў салоне знаходзіліся ўсяго 7 пасажыраў, і вырашылі правесці дэталёвы агляд.
Падчас праверкі ў канструкцыі спальніх месцаў вадзіцеляў былі выяўлены тайнікі з кантрабанднымі цыгарэтамі. Дадатковы агляд з дапамогай рэнтген-сістэмы выявіў яшчэ больш тайнікоў — у падлозе, столі і іншых канструктыўных поласцях аўтобуса. Агульны кошт канфіскаваных цыгарэт NZ Gold з улікам падаткаў склаў 12 375 еўра.
У Вільнюскім аддзеле Мытнай крымінальнай службы распачата дасудовае расследаванне па факце кантрабанды пад кіраўніцтвам пракурораў Вільнюскай акруговай пракуратуры.
Абодва вадзіцелі затрыманы. Паводле рашэння Вільнюскага раённага суда ім прызначаны меры стрымання: канфіскацыя дакументаў, пісьмовае абавязацельства не выязджаць з краіны і абавязак рэгулярна рэгістравацца ў паліцыі, паведамілі ў Літоўскай мытні.
