Прэс-служба МУС анансавала новае спецыяльнае мерапрыемства беларускай ДАІ.
З 17 па 24 жніўня будзе праводзіцца мерапрыемства агульнанацыянальнага маштабу, накіраванае на павышэнне бяспекі грузавых перавозак.
“Асаблівая ўвага нададзена прафілактыцы парушэнняў, якія здзяйсняюцца кіроўцамі пры перавозцы сыпкіх грузаў, а таксама іншай сельскагаспадарчай прадукцыі”, – паведамілі ў прэс-службе МУС.
Будзе ўзмоцнены кантроль за размяшчэннем і станам грузу, які перавозіцца, выкарыстаннем ахоўных тэнтаў, а таксама недапушчальнасцю забруджвання праезнай часткі.
Пры выяўленні парушэнняў, звязаных з допускам да перавозкі няспраўнага транспарту і транспарту, які не мае адпаведных дазволаў, службовыя асобы будуць прыцягвацца да адміністрацыйнай адказнасці.
Нагадаем, беларуская ДАІ з 6 па 16 жніўня праводзіла рэспубліканскую прафілактычную акцыю «Матацыкліст».