Суд Чэрвеньскага раёна вынес абвінаваўчы прысуд былому дырэктару аднаго з прадпрыемстваў нафтахімічнага комплексу, яго зяцю і яшчэ двум грамадзянам. Яны прызнаныя вінаватымі ў прысваенні маёмасці шляхам злоўжывання службовымі паўнамоцтвамі.
Паводле версіі абвінавачання, былы дырэктар прадпрыемства і яго зяць не пазней за снежань 2021 года распрацавалі схему прысваення сродкаў прадпрыемства пад выглядам аплаты сельскагаспадарчай тэхнікі і абсталявання для курыруемага аграрнага прадпрыемства.
Дырэктар павінен быў забяспечваць набыццё тавараў па загадзя завышанай цане. У сваю чаргу, зяць дамовіўся з пастаўшчыком, які пагадзіўся забяспечыць сістэмныя пастаўкі тэхнікі і абсталявання праз прадстаўленыя ім замежныя і беларускую камерцыйныя арганізацыі. Пры гэтым у кошт пастаўкі ўключалася сума сродкаў для прысваення, якую яму загадзя паведамлялі.
Чацвёрты абвінавачаны, індывідуальны прадпрымальнік, у гэтай схеме займаўся вывадам грошай, іх абнаяўленнем і размеркаваннем паміж удзельнікамі схемы.
У выніку, паводле версіі абвінавачання, яны завалодалі 660 тыс. еўра.
У судовым пасяджэнні трое абвінавачаных віну не прызналі і шкоду не кампенсавалі, адзін з абвінавачаных прызнаў віну ў поўным аб’ёме і прыняў меры да кампенсацыі шкоды.
Былому дырэктару прадпрыемства прызначана пакаранне ў выглядзе пазбаўлення волі на тэрмін 10 гадоў, яго зяцю — на тэрмін 9 гадоў, індывідуальнаму прадпрымальніку — на тэрмін 7 гадоў. Кожнаму з абвінавачаных прызначана дадатковае пакаранне ў выглядзе штрафу ў памеры 1000 базавых велічынь (45 тыс. рублёў). Чацвёртаму абвінавачанаму з прымяненнем арт. 70 Крымінальнага кодэкса Рэспублікі Беларусь прызначана пакаранне ў выглядзе 5 гадоў абмежавання волі з накіраваннем ва ўстанову адкрытага тыпу са штрафам у памеры 500 базавых велічынь (22,5 тыс. рублёў). Усе абвінавачаныя пазбаўлены права займаць пасады, звязаныя з выкананнем арганізацыйна-распарадчых, адміністрацыйна-гаспадарчых абавязкаў і здзяйсненнем юрыдычна значных дзеянняў, на 5 гадоў.
Прысуд яшчэ не ўступіў у законную сілу, можа быць абскарджаны або апратэставаны ў апеляцыйным парадку.