Адгрузкі беларускага паліва ў Расію знізіліся на мяжы ліпеня і жніўня. Пра гэта піша «Коммерсантъ» са спасылкай на крыніцу ў галіне.
Паводле яго інфармацыі, продажы чыгуначных партый беларускага бензіну ў РФ з 20 ліпеня па 12 жніўня склалі 21 тыс. тон супраць 165 тыс. тон за перыяд з 22 чэрвеня па 17 ліпеня, а дызельнага паліва за той жа перыяд скараціліся да 8,5 тыс. тон супраць 115,9 тыс. тон адпаведна. Крыніца адзначыла, што ўдзельнікі рынку знізілі закупкі беларускага паліва ў надзеі на паляпшэнне сітуацыі з вытворчасцю бензіну ў РФ у жніўні.
Раней паведамлялася, што ў ліпені беларускія адгрузкі паліва ў РФ былі рэкорднымі і склалі 212 тыс. тон бензіну і 162 тыс. тон дызельнага паліва.
Выданне адзначае, што новая хваля дэфіцыту паліва можа прыйсціся на верасень з-за планавых рамонтаў на буйных расійскіх прадпрыемствах і беларускім «Нафтане».
Два беларускія НПЗ могуць вырабляць каля 3,5 млн тон бензіну ў год, гаворыцца ў артыкуле. З іх крыху больш за 2 млн тон ідзе на экспарт. Сярэднемесячны патэнцыял экспарту з кожнага з двух заводаў складае крыху больш за 80 тыс. тон. Для параўнання: унутраны попыт на аўтабензін у РФ складае каля 40 млн тон у год (3,3 млн тон у месяц).
Варта адзначыць, што на пачатку ліпеня таксама адзначалася скарачэнне продажаў беларускага паліва на Пецярбургскай біржы, аднак у выніку месяц стаў рэкордным.
