Беларусь нарасціла імпарт расійскіх макаронных вырабаў па выніках студзеня—ліпеня. Пра гэта сведчыць статыстыка, апублікаваная цэнтрам «Аграэкспарт» расійскага Міністэрства сельскай гаспадаркі.
Паводле яго даных, пастаўкі расійскіх макаронных вырабаў у нашу краіну склалі 37 млн долараў. Гэта на 3,7 млн долараў больш, чым за аналагічны перыяд мінулага года.
Рост аб’ёмаў імпарту ў вартасным выражэнні можа быць звязаны з ростам цэн. У студзені—ліпені ў цэлым РФ (без уліку краін ЕАЭС за ліпень) паставіла за мяжу 66 тыс. т макаронных вырабаў на суму каля 112 млн долараў. У вартасным выражэнні экспарт вырас на 7% у параўнанні з аналагічным перыядам мінулага года, але ў натуральным выражэнні ён скараціўся на 8,3%.
У першую пяцёрку экспартных напрамкаў таксама ўвайшлі Казахстан (каля 26 млн долараў), Узбекістан (12 млн долараў), Азербайджан (больш за 6,5 млн долараў), Грузія (больш за 6 млн долараў).