Прэзідэнт Украіны Уладзімір Зяленскі падпісаў указы аб увядзенні новага пакета санкцый у рамках сінхранізацыі з 20-м пакетам ЕС. Абмежаванні распаўсюджваюцца на 16 грамадзян Расіі і 31 кампанію з Расіі, Беларусі, ААЭ, Кыргызстана, Казахстана, Узбекістана і акупаваных тэрыторый Украіны, паведамілі ў Офісе ўкраінскага лідара.
У санкцыйны спіс уключаны прадпрыемствы расійскага ВПК, вытворцы сістэм радыёэлектроннай барацьбы, праграмнага забеспячэння і кампанентаў для дронаў, кампаніі па здабычы нафты, газу і золата. У прыватнасці, санкцыі ўведзены супраць расійскага вытворцы аэракасмічнай прадукцыі і кампанентаў для дронаў «Атлант Аэра» і вытворцы сістэм сувязі і кампанентаў для БПЛА і ракет «Ірз-Сувязь».
Уведзены санкцыі ў дачыненні да кампаній з ААЭ, якія прадаюць станкі і абсталяванне для лабараторый, хімічную прадукцыю і запасныя часткі для камерцыйных самалётаў, а таксама ў дачыненні да беларускага экспарцёра нафтапрадуктаў.
Сярод фізічных асоб — расійскі пракурор Людміла Баландзіна і суддзя Дзмітрый Гардзееў, а таксама прапагандыстка Марыя Сітэль. Санкцыі ўведзены таксама супраць 19 грамадзян Ірана, 7 грамадзян Судана і 11 іранскіх кампаній, звязаных з вытворчасцю балістычных ракет і дронаў.
«Мы працягваем сінхранізаваць санкцыйныя рэжымы з ЕС і партнёрамі. Чакаем далейшага ўзмацнення ціску на Расію і ўсіх, хто дапамагае ёй падтрымліваць агрэсію. Ужо завяршаем сумесную працу над праектамі наступных санкцыйных рашэнняў ЕС і дзяржаў-партнёраў, у прыватнасці 21-га пакета санкцый», — адзначыў упаўнаважаны прэзідэнта Украіны па пытаннях санкцыйнай палітыкі Уладзіслаў Уласюк.
Нагадаем, у 20-ты пакет санкцый Еўрасаюза супраць Расіі трапілі кампаніі, звязаныя з ваенна-прамысловым комплексам Беларусі і рэжымам Лукашэнкі. У санкцыйны спіс увайшлі сумеснае таварыства з абмежаванай адказнасцю «Волат-Санцзян» і ЗАТ «Беларуская нафтавая кампанія» (БНК).
