Украіна і Расія дамовіліся правесці абмен 314 палоннымі. Пра гэта паведаміў спецпасланнік прэзідэнта ЗША Стыў Уіткаф.
“Сёння дэлегацыі ЗША, Украіны і Расіі дамовіліся аб абмене 314 палоннымі — гэта першы такі абмен за пяць месяцаў”, — напісаў ён.
Уіткаф дадаў, што дамоўленасці былі дасягнутыя на мірных перамовах, якія былі дэталёвымі і прадуктыўнымі.
“Хаця наперадзе яшчэ шмат працы, такія крокі дэманструюць, што пастаяннае дыпламатычнае ўзаемадзеянне прыносіць адчувальныя вынікі і прасоўвае намаганні па спыненні вайны ва Украіне.
Абмеркаванні будуць працягнутыя, і ў найбліжэйшыя тыдні чакаецца далейшы прагрэс”, — заявіў ён.
Нагадаем, у ААЭ 4–5 лютага праходзяць сустрэчы дэлегацый ЗША, Украіны і Расіі.
Прэзідэнт Украіны Уладзімір Зяленскі учора ўжо анансаваў абмен палоннымі, аднак не называў іх колькасць.
