Прэзідэнт Украіны Уладзімір Зяленскі паведаміў, што ўкраінскія спецыялісты ўжо некалькі тыдняў працуюць у Аб’яднаных Арабскіх Эміратах, дапамагаючы ўзмацніць абарону ад паветраных пагроз. Вынікі працы ўкраінскай каманды былі абмеркаваны перад сустрэчай Зяленскага з прэзідэнтам ААЭ Мухамадам бін Заідам Аль Нахаянам.
Паводле слоў украінскага лідара, украінскія эксперты правялі сустрэчы з прадстаўнікамі сіл бяспекі і абароны ААЭ. Гаворка ідзе пра комплексныя рашэнні па абароне неба і крытычнай інфраструктуры, заснаваныя на ўкраінскім баявым досведзе.
«Сёння Украіна не толькі мае патрэбу ў дапамозе, але і сама гатова падтрымаць тых, хто падтрымлівае нас. (…) Ужо ёсць выразнае разуменне таго, як можна ўмацаваць сістэму абароны неба і крытычнай інфраструктуры ў Эміратах, інтэграваўшы ўкраінскі досвед», — паведаміў прэзідэнт.
