Цэнтральнае следчае бюро польскай паліцыі паведаміла пра буйную аперацыю супраць групы, якая займалася незаконнай легалізацыяй замежнікаў. Аперацыя была праведзена разам з Памежнай аховай і пракуратурай.
Паводле інфармацыі паліцыі, група дзейнічала з 2020 па 2024 год. Яна выкарыстоўвала для легалізацыі замежнікаў падробныя дакументы, уключаючы фіктыўныя даведкі пра працаўладкаванне і месцы жыхарства. На падставе такіх дакументаў затым падаваліся хадайніцтвы аб атрыманні віда на жыхарства. Паводле інфармацыі паліцыі, да 1500 грамадзян Узбекістана, Таджыкістана, Грузіі, Турцыі і іншых краін маглі скарыстацца паслугамі групы, якія каштавалі 3–5 тыс. злотых (каля 800–1400 долараў).
У аперацыі, якая праводзілася на тэрыторыі трох ваяводстваў, узялі ўдзел больш за 160 паліцэйскіх і памежнікаў. Затрыманыя 24 чалавекі, у тым ліку грамадзяне Украіны, Польшчы, Беларусі, Узбекістана, Пакістана і Філіпін. У кіраўніцтве групай падазраюцца 52-гадовы грамадзянін Польшчы і 39-гадовы грамадзянін Украіны.
Падчас вобшукаў канфіскаваныя аргтэхніка, тэлефоны, дакументы, грошы на суму 40 тыс. злотых, а таксама аўтамабіль. Пракуратура прад’явіла затрыманым абвінавачанні ва ўдзеле ў арганізаванай злачыннай групе, садзеянні незаконнаму знаходжанню замежнікаў, падробцы дакументаў і дачы ілжывых паказанняў. Суд вынес рашэнне аб арышце двух падазраваных, астатнія змешчаны пад нагляд паліцыі, ім забаронена пакідаць тэрыторыю краіны.
Адзначаецца, што не менш за 20 замежнікаў, легалізаваных пры дапамозе групы, у далейшым здзяйснялі злачынствы ў іншых краінах ЕС, пры гэтым часта ў структурах мясцовых злачынных арганізацый.
