Музей Вольнай Беларусі далучыцца да сёлетняга фестывалю Warsaw Gallery Weekend у якасці афіцыйнай музейнай інстытуцыі, якая прадстаўляе беларускае сучаснае мастацтва. У межах галоўнага фестывалю сучаснага мастацтва Цэнтральнай Еўропы музей прадставіць персанальны праект мастака Аляксандра Адамава.
Як паведамілі ў прэс-службе ўстановы, удзел у Warsaw Gallery Weekend у новым статусе азначае прызнанне Музея Вольнай Беларусі як паўнавартаснай еўрапейскай культурнай прасторы. Сёння інстытуцыя працуе не толькі як месца захавання гістарычнай памяці, але і як адкрытая платформа для супольных праектаў незалежных аўтараў.
У межах афіцыйнай праграмы фестывалю 18 верасня ў музеі адкрыецца персанальная выстава Аляксандра Адамава «hyperMOTHER.Shared Breathing». Экспазіцыя беларускага мастака развіваецца як доўгатэрміновы мастацкі цыкл і даследуе тэмы біяпалітыкі клопату, дэлегавання цялеснасці ды экзістэнцыяльнай стомленасці сучаснага чалавека.
Фестываль Warsaw Gallery Weekend пройдзе ў Варшаве ўжо ў 16-ты раз. На працягу трох дзён — з 18 па 20 верасня — вядучыя галерэі і мастацкія цэнтры польскай сталіцы прадставяць найбольш актуальныя арт-праекты рэгіёна.
Warsaw Gallery Weekend лічыцца найбуйнейшым у Польшчы і Цэнтральнай Еўропе штогадовым фестывалем сучаснага мастацтва. Ён праводзіцца з 2011 года па аналогіі з берлінскім Gallery Weekend: на некалькі дзён прыватныя галерэі, музеі і культурныя цэнтры Варшавы аб’ядноўваюцца ў адзіную арт-маршрутную сетку, якую наведваюць куратары, арт-крытыкі і калекцыянеры з усяго свету.
Падпісвайцеся на культурныя навіны Reform.news у Telegram
