Брэсцкія мытнікі ў пункце пропуску «Брэст» выявілі спробу незаконнага вывазу буйной партыі старадаўніх банкнот. Парушальнікам аказаўся 37-гадовы беларус, кіроўца рэйсавага аўтобуса паведамленнем «Брэст — Варшава», паведамляе прэс-служба Мытнага камітэта.
Падчас вуснага апытання мужчына заявіў пра адсутнасць тавараў, якія падлягаюць дэклараванню. Аднак пры аглядзе асабістых рэчаў у яго заплечніку выявілі кардонную скрынку са 138 дзяржаўнымі крэдытнымі білетамі розных наміналаў і гадоў выпуску.
Мытная экспертыза ўстанавіла, што 136 з іх адносяцца да катэгорыі культурных каштоўнасцяў, паколькі былі створаныя больш за 100 гадоў таму. Кошт калекцыі склаў каля 1,6 тысячы рублёў. У дачыненні да мужчыны пачаты адміністрацыйны працэс.
У мытні нагадалі, што пры выездзе з Беларусі культурныя каштоўнасці падлягаюць абавязковаму дэклараванню, а для іх вывазу неабходны дазвол Міністэрства культуры.
