Супрацоўнікі 5-га ўпраўлення ГУБАЗіК МУС па Мінску затрымалі раней судзімага мужчыну, якога падазраюць у спробе завалодаць двухпакаёвай кватэрай 49-гадовага жыхара сталіцы.
Паводле інфармацыі МУС, 37-гадовы прадстаўнік адной з дыяспар, які прадстаўляўся рыелтарам, на працягу двух месяцаў спрабаваў атрымаць кантроль над прыватызаваным жыллём. Як сцвярджаюць у ведамстве, ён выбраў уладальніка кватэры, які «меў згубныя звычкі і праз гэта лёгка паддаваўся маніпуляцыям».
Падазраваны паведаміў мужчыну, што даведаўся пра адрас кватэры з запазычанасцю па камунальных плацяжах ад супрацоўнікаў праваахоўных органаў. Пасля гэтага ён пачаў дапамагаць уладальніку з аплатай паслуг ЖКГ і перадаваў яму невялікія сумы грошай.
Напярэдадні афармлення здзелкі гаспадар кватэры высветліў, што замест абяцанай аднапакаёвай кватэры ў Мінску і грашовай даплаты яму прапануюць жыллё ў населеным пункце прыкладна за 50 кіламетраў ад сталіцы. Пасля адмовы ад здзелкі падазраваны перайшоў ад угавораў да пагроз і прымянення сілы. Ён збіў мужчыну і прымусіў яго напісаць распіску пра неіснуючы буйны доўг.
Затрымлівалі фігуранта з дапамогай байцоў спецпадраздзялення «Алмаз». Узбуджаная крымінальная справа паводле артыкула аб вымагальніцтве з мэтай атрымання маёмаснай выгады ў асабліва буйным памеры.
Мужчыну пагражае да 15 гадоў пазбаўлення волі.