Больш за 74 тысячы адзінак жавальнай гумкі і спрэяў для паражніны рота выявілі гродзенскія мытнікі ў грузавіку польскага перавозчыка без указання ў дакументах. Кошт тавару перавысіў 3 млн рублёў, паведамілі ў Мытным камітэце Беларусі.
Грузавік Volvo прыбыў з Польшчы ў пункт пропуску «Бераставіца». Падчас агляду высветлілася, што фактычная колькасць жавальнай гумкі большая за заяўленую, а звесткі пра спрэі для паражніны рота адсутнічаюць у суправаджальных дакументах.
Паводле ацэнкі мытні, недэклараванне тавару магло прывесці да недаплаты каля 390 тысяч рублёў мытных плацяжоў.
У дачыненні да перавозчыка пачаты адміністрацыйны працэс па ч. 1 арт. 15.5 КаАП. Яму можа пагражаць штраф да 30% ад кошту тавару, а таксама абавязак выплаціць усе належныя плацяжы.
