Арыштаваную кватэру гродзенскага журналіста Уладзіміра Хільмановіча, якога завочна прысудзілі да пяці гадоў калоніі і штрафу па «экстрэмісцкіх» артыкулах, збіраюцца прадаць на аўкцыёне, паведамляе БАЖ.
Хільмановіч атрымаў ліст з аддзела прымусовага выканання Ленінскага раёна Гродна, у якім гаворыцца, што яго кватэру ацанілі ў 126 тысяч рублёў. Ацэнку 25 лютага правёў мясцовы філіял «БелЮрЗабеспячэння» — структура Мінюста, якая займаецца продажам на аўкцыёне канфіскаванай і арыштаванай маёмасці. Дата таргоў пакуль не прызначана.
Штраф Хільмановіча складае 40 тысяч рублёў. Ён думае, што сродкі, якія застануцца пасля выплаты штрафу, павінны перавесці на банкаўскі рахунак, але ў яго няма рахунку ў беларускім банку.
«І яшчэ, калі гэтыя грошы я не забяру, то яны праз некаторы час будуць канфіскаваны на карысць дзяржавы», — кажа журналіст.
У кватэры зарэгістраваны сам Хільмановіч і яго старэйшы сын.
Хільмановіч з’ехаў з Беларусі ў 2021 годзе. У 2024 годзе яго завочна прысудзілі да пяці гадоў калоніі па артыкулах аб садзейнічанні «экстрэмісцкай» дзейнасці (частка 1 артыкула 361-4 КК) і ўдзеле ў «экстрэмісцкім» фарміраванні (частка 3 артыкула 361-1 КК).
