Трэнер беларускай футбольнай каманды Аляксей Гарошка, які пацярпеў пры атацы беспілотніка на аўтобус з футбольнай камандай з Беларусі ў Бранскай вобласці, выпісаны з 432-га Галоўнага ваеннага клінічнага медыцынскага цэнтра. Пра гэта паведамілі ў Міністэрстве абароны Беларусі.
Паводле інфармацыі ведамства, Гарошка праходзіў лячэнне ў шпіталі, перанёс некалькі аперацый і прайшоў двухтыднёвую рэабілітацыю. Кіраўнік Рэспубліканскага цэнтра па лячэнні агнястрэльных раненняў і мінна-выбуховых траўмаў палкоўнік медыцынскай службы Аляксей Трухан паведаміў, што лячэнне будзе працягнута амбулаторна.
«Што датычыцца гэтага пацыента: ён вельмі моцна перажываў нават не за сваё здароўе, а за здароўе хлопцаў, сваіх выхаванцаў, якія пацярпелі ў аўтобусе. Заўважыўшы гэта падчас чарговай кансультацыі, я пагаварыў з хлопцамі, перадаў ім прывітанне ад трэнера, спытаў, ці гатовыя яны займацца далей.
Адзін хлопчык — брамнік, другі нападнік: сказалі, што яны гатовыя займацца, далей трэніравацца. Я расказаў Аляксею пра гэта, што дзеці і надалей бачаць у ім трэнера. На яго гэта вельмі моцна паўплывала. Мы адразу ўбачылі, як ён расквітае і пачынае імкнуцца да выздараўлення.
Яго хвалявала нават не ўласнае здароўе, а менавіта хвалявалі хлопцы. І мы ведаем, што бацькоўскі чат яго падтрымліваў, што хлопцы, якія былі ў Рэчыцы, падтрымлівалі яго, перадавалі яму свае паведамленні», — расказаў ён.
Гарошка падзякаваў ваенным медыкам за аказаную дапамогу.
«Тут мяне крыху падлячылі, падлаталі. А на рэабілітацыю хочацца дадому. Усё ж такі дома і сцены, як кажуць, лечаць і дапамагаюць. Хлопцы ўсе рвуцца ў бой. Я ў тым ліку. Прыеду дадому, перафарматуюся. І ўсё будзе… Усё будзе нармальна», — сказаў ён.
Нагадаем, аўтобус з беларускімі дзецьмі, якія накіроўваліся на адпачынак у расійскі Геленджык, 17 чэрвеня быў атакаваны, як мяркуецца, беспілотнікам у Бранскай вобласці Расіі. У выніку загінула жанчына, якая суправаджала групу, восем чалавек, у тым ліку шасцёра дзяцей, атрымалі раненні. Масква заяўляе, што аўтобус быў атакаваны ўкраінскім дронам, Кіеў адхіляе гэтыя абвінавачанні і называе тое, што адбылося, інфармацыйнай правакацыяй.
Як пісалі СМІ, загінулая — Вікторыя Гарошка (Грыцэнка), жонка Аляксея Гарошкі.
