Прэзідэнт ЗША Дональд Трамп заявіў, што да Ірана накіравана вялікая колькасць ваенных караблёў. Паводле яго слоў, ён не хацеў бы іх выкарыстоўваць.
“Ведаеце, у нас шмат караблёў, якія ідуць у гэтым кірунку на ўсялякі выпадак. У нас ёсць вялікая флатылія, якая ідзе ў гэтым кірунку. І паглядзім, што адбудзецца. У нас ёсць вялікія сілы, якія ідуць да Ірана. Я аддаў бы перавагу, каб нічога не адбылося, але мы вельмі ўважліва за імі сочым”, — сказаў ён на борце свайго самалёта, вяртаючыся з Давоса.
Трамп таксама заявіў, што прадухіліў павешанне ў Іране 837 чалавек.
“837, у асноўным маладых мужчын, збіраліся павесіць у чацвер. І я сказаў: «Калі вы павесіце гэтых людзей, вас ударыць мацней, чым калі-небудзь. На гэтым фоне тое, што мы зрабілі з вашай іранскай ядзернай праграмай, падасца драбязой». І за гадзіну да таго, як павінна было адбыцца гэтае жахлівае здарэнне, яны яго адмянілі. І яны фактычна сказалі, што адмянілі яго. Яны не адклалі яго. Яны адмянілі яго. Так што гэта быў добры знак”, — дадаў ён.
Паводле яго слоў, Ірану варта заключыць здзелку з ЗША. Ён таксама пацвердзіў, што ўвядзе мытныя пошліны ў 25% у дачыненні да краін, якія гандлююць з Іранам.
На гэтым тыдні СМІ паведамлялі, што на Блізкі Усход накіраваны авіяносец Abraham Lincoln у суправаджэнні эсмінцаў.
