Студэнта са Шры-Ланкі, які вучыўся на чацвёртым курсе аднаго з віцебскіх універсітэтаў, дэпартавалі з Беларусі за махлярства. На разгляд крымінальнай справы запрасілі замежных студэнтаў, паведамляе УУС Віцебскага аблвыканкама.
У ліпені 2025 года першакурснік паскардзіўся ланкійцу на праблемы. У забаўляльнай установе ён увайшоў у канфлікт з аховай і вырашыў, што ў яго будуць непрыемнасці. Чацвёртакурснік паабяцаў дапамагчы малодшаму таварышу за 300 рублёў. Першакурснік перадаў грошы, а калі высветлілася, што праблем з законам у яго няма, запатрабаваў вярнуць суму. Чацвёртакурснік адмовіўся вяртаць грошы, і пацярпелы звярнуўся ў міліцыю.
У дачыненні да чацвёртакурсніка была ўзбуджана крымінальная справа па артыкуле аб махлярстве. У сувязі з прымяненнем мер адміністрацыйнай адказнасці справа была спынена. Замежніку прызначылі штраф у памеры 30 базавых велічынь (1350 рублёў). Таксама было прынята рашэнне аб яго дэпартацыі з Беларусі з забаронай на ўезд тэрмінам на пяць гадоў.