Святлана Ціханоўская на V Канферэнцыі беларусаў і беларусак свету ў Варшаве распавяла пра чаканні ад маючага адбыцца візіту спецыяльнага пасланніка прэзідэнта ЗША Джона Коўла ў Мінск, які той анансаваў праз два-тры тыдні.
Паводле яе слоў, Офіс будзе загадзя папярэджаны пра візіт і пра тое, колькі палітвязняў плануецца вывезці за мяжу.
“Я ўсяго распавесці, вядома, не магу, таму што гэты працэс даволі закрыты і складаны. Мы будзем папярэджаны загадзя, калі гэта адбудзецца, і прыкладна якая колькасць будзе людзей, таму што нашы партнёры амерыканскія разумеюць, што нам таксама трэба падрыхтавацца, калі будуць тыя палітычныя зняволеныя, якіх будуць вывозіць за мяжу”, – распавяла яна.
Палітык абазначыла ключавыя патрабаванні, якія беларускі бок просіць амерыканцаў даносіць да рэжыму Лукашэнкі. Палітвязні павінны мець выбар — застацца ў краіне або з’ехаць, неабходны доступ да людзей, якія знаходзяцца ў цяжкім становішчы, у тым ліку з дзецьмі і цяжкімі хваробамі, рэпрэсіі павінны спыніцца.
“І таксама не спыняемся гаварыць пра працяг рэпрэсій. Таму што нашы амерыканскія партнёры таксама гэта разумеюць – і мы даводзім, што пакуль вызваляюць аднаго, саджаюць двух – і так можа быць бясконца – набіраць людзей і людзьмі гандляваць.
Мы ўжо не раз казалі, што амерыканцы не наіўныя, яны гэта ўсё добра разумеюць. Яны крок за крокам ідуць, каб вызваліць як мага больш людзей. І мы пастаянна на сувязі, я не буду дэталёва распавядаць, але, спадзяюся, што ў гэтым месяцы будуць добрыя навіны”, – заявіла лідар дэмсіл.
