Слаламны канал пад Мінскам запоўнілі вадой — гэта звязана з рэканструкцыяй гідратэхнічнага збудавання на Заслаўскім вадасховішчы ў раёне вёскі Ганалес. Пра гэта паведаміў дырэктар ДП «Гордорстрой» Сяргей Панёў, перадае БелТА.
Рамонт самога гідравузла патрабуе яго вызвалення ад вады, таму для падтрымання ўзроўню ракі Свіслач і водных аб’ектаў Мінска вада падаецца праз грабны канал — 2-гі водавыпуск Заслаўскага вадасховішча. Падача вады плануецца на працягу ўсяго 2026 года да завяршэння асноўных будаўнічых работ.
Як паведамілі ва УП “Мінскводаканал”, аб’ём падаванай вады разлічаны толькі для падтрымання неабходных узроўняў. Выкарыстоўваць канал для плавання, у тым ліку з ужываннем плавальных сродкаў, нельга. Наведвальнікам рэкамендуецца выконваць меры засцярогі.
Мінскі слаламны канал быў пабудаваны ў 1981 годзе як дакладная копія алімпійскай трасы ў Мюнхене і служыў трэніровачнай базай для зборнай СССР па веславым слаламе. Доўгія гады ён не эксплуатаваўся.
