Беларусь закрые пасольства ў Фінляндыі. У нацыянальным рэестры прававых актаў зарэгістраваная пастанова Саўміна Беларусі №424 ад 20 жніўня пад назвай “Аб закрыцці Пасольства Рэспублікі Беларусь у Фінляндскай Рэспубліцы”.
Дакумент яшчэ не апублікаваны, тэрміны закрыцця пасольства пакуль невядомыя.
Нагадаем, Аляксандр Лукашэнка з увядзеннем санкцый супраць яго еўрапейскімі краінамі яшчэ ў 2021 годзе выказваўся за перагляд размяшчэння дыпламатычных прадстаўніцтваў за мяжой. Так, ён прапаноўваў скараціць штат беларускіх замежных устаноў у Еўропе. Ён таксама выказваўся за тое, каб аптымізаваць пасольствы Беларусі ў ЕС, адкрыўшы замест іх дыпламатычныя прадстаўніцтвы ў краінах Афрыкі і Азіі.
Беларусь у 2021 годзе ўжо закрыла пасольства ў Канадзе. У 2023 годзе было закрыта пасольства ў Славакіі, аднак у 2025 годзе пасля прыходу да ўлады ў гэтай краіне Роберта Фіца пасольства было адкрыта зноў.
