Сёння на 57-м пасяджэнні Сената Польшчы была аднагалосна прынята рэзалюцыя ў сувязі з пятай гадавінай утрымання пад вартай Анджэя Пачобута — журналіста, лідара польскай меншасці ў Беларусі і лаўрэата еўрапейскай прэміі імя Сахарава.
У дакуменце сенатары заклікалі беларускія ўлады неадкладна вызваліць палітвязня.
«Памятаючы пра польскую барацьбу за правы чалавека і суверэннае існаванне дзяржавы, мы выказваем поўную салідарнасць з беларускімі змагарамі за дэмакратыю і свабоду», — гаворыцца ў рэзалюцыі.
Сенат таксама нагадаў, што 30 гадоў таму ў Беларусі быў заснаваны незалежны праваабарончы цэнтр “Вясна”, і выказаў перакананне, што намаганні і ахвяра беларускіх праваабаронцаў стануць фундаментам будучай свабоднай Беларусі.
«Мы заклікаем улады ў Мінску спыніць рэпрэсіі, вызваліць усіх палітычных зняволеных і пачаць палітычны дыялог з сіламі апазіцыі ўнутры краіны і ў эміграцыі з мэтай аднаўлення міру, сацыяльнай стабільнасці і рэалізацыі еўрапейскіх і дэмакратычных памкненняў беларускага грамадства», — напісалі сенатары.
Маршалак Сената Польшчы Малгажата Кідава-Блоньска перадала рэзалюцыю лаўрэату Нобелеўскай прэміі Алесю Бяляцкаму.
У лютым 2023 года журналіста Анджэя Пачобута прыгаварылі да 8 гадоў калоніі ўзмоцненага рэжыму. Працэс праходзіў у закрытым рэжыме. Яго прызналі вінаватым у распальванні варожасці і закліках да санкцый. Пачобут адбывае тэрмін у калоніі ў Наваполацку.
