Міністры замежных спраў Беларусі і Ірана Максім Рыжанкоў і Аббас Аракчы падпісалі дэкларацыю аб кіруючых прынцыпах, якія тычацца супрацьдзеяння аднабаковым прымусовым мерам і шляхоў змякчэння і ліквідацыі іх негатыўных наступстваў.
Таксама па выніках перамоў былі падпісаны дэкларацыя аб узмацненні ролі міжнароднага права ў міжнародных адносінах і праграма супрацоўніцтва міністэрстваў замежных спраў Беларусі і Ірана на 2026–2030 гады.
Каментуючы вынікі сустрэчы, Максім Рыжанкоў назваў іх жывым доказам паступальнага і дынамічнага развіцця адносін Мінска і Тэгерана. Паводле яго слоў, гэта спрыяе стабільнасці ў рэгіёне і на глабальнай арэне. Ён адзначыў высокі ўзровень узаемаразумення з Іранам. Рыжанкоў выказаў задавальненне вынікамі пасяджэння міжурадавай камісіі.
“Спадзяёмся, што ў бліжэйшай будучыні ўдасца падцягнуць узровень развіцця двухбаковых эканамічных адносін да тых высокіх стандартаў, якія зададзены лідарамі нашых краін у рамках палітычнага дыялогу. Упэўнены, што ўступленне ў сілу 15 мая бягучага года Пагаднення аб свабодным гандлі паміж ЕАЭС і Іранам дасць добрыя вынікі і будзе служыць інтарэсам міру і развіцця ў Еўразіі”, — сказаў ён.
“Мінск таксама вітае імкненне Тэгерана ўдзельнічаць у распрацоўцы Еўразійскай Хартыі разнастайнасці і шматпалярнасці ў XXI стагоддзі. Як дзяржавы, якія падвергліся санкцыйнаму ціску, Беларусь і Іран асуджаюць ужыванне эканамічных рэстрыкцый, што супярэчаць прынцыпам міжнароднага права, наносяць шкоду, найперш, звычайным людзям і правакуюць эскалацыю напружанасці. У сувязі з гэтым з задавальненнем адзначаю паспяховае ўзаемадзеянне нашых краін у рамках ШАС і БРІКС для прасоўвання нацыянальных інтарэсаў на дадзеных міжнародных пляцоўках, якія прадстаўляюць голас сусветнай большасці”, — працягнуў ён.
Рыжанкоў выказаў гатоўнасць наведаць Іран з візітам.
“Сённяшнія перамовы паказалі, што паміж нашымі сталіцамі сфарміравана агульнае бачанне пабудовы стратэгічнага партнёрства. Наперадзе нас чакаюць новыя крокі і сумесныя праекты”, — падсумаваў ён.
