Расіянін Антон Лысаў быў затрыманы ў Беларусі за падпал аўтамабіля кіраўніка Дзяржаўнага камітэта судовых экспертыз Аляксея Волкава ў 2021 годзе. Ён расказаў, як яго затрымалі і як яго збіваў кіраўнік беларускага МУС Іван Кубракоў, піша «Медыязона».
Лысаў нарадзіўся ў расійскіх Чабаксарах. У 2021 годзе Лысаву было 22 гады, ён шукаў падпрацоўку і знайшоў у даркнэце аб’яву: заказчык абяцаў 2 тысячы долараў за падпал машыны ў Мінску. У той час Лысаў знаходзіўся ў Санкт-Пецярбургу. Ён пагадзіўся на заказ і прыехаў у Мінск праз Маскву.
Лысаў сцвярджае, што не звязваў заказ з палітыкай, а проста хацеў зарабіць.
У Мінску ён выявіў, што заказаны яму Toyota Land Cruiser знаходзіцца пад аховай. Ён дачакаўся, пакуль ахова сыдзе, і ў ноч на 1 кастрычніка абліў машыну бензінам і падпаліў. Пасля гэтага ён вярнуўся ў здымную кватэру, дзе яго затрымалі праз 11 гадзін. У тую ж ноч быў затрыманы 18-гадовы Захар Таразевіч, які павінен быў зрабіць фота згарэлага аўтамабіля. Таразевіч і Лысаў праходзілі па адной крымінальнай справе.
Згарэлы аўтамабіль належаў старшыні Дзяржаўнага камітэта судовых экспертыз Аляксею Волкаву. Лысава і Таразевіча абвінавацілі ў тэрарызме.
Паводле слоў Лысава, у міліцыю яго везлі з мяшком на галаве, па дарозе збівалі, выкручвалі пальцы і прымянялі душачыя прыёмы.
«Пыталі, пыталі — хто ты, што ты. Я казаў, што нічога не ведаю, адмаўляў да апошняга, казаў, што я не падпальваў. Я думаў, гэта пракаціць — але ў Беларусі гэта не пракаціць. Там няма правасуддзя наогул, а я яшчэ і ў палітычны замес трапіў. Калі б я быў беларус, яны б мяне, напэўна, проста ў лесе павесілі — мне так і казалі, калі затрымлівалі, што проста вывезем у лес зараз і ўсё», — расказаў Лысаў.
Лысаў сцвярджае, што ў аддзеле міліцыі да яго прыйшоў кіраўнік МУС Іван Кубракоў. Паводле яго слоў, Кубракоў пачаў націскаць на болевыя кропкі на твары і за вушамі, у той час як Лысаў сядзеў са звязанымі за спінай рукамі.
«Я пачаў выдаваць гукі, рыкаць. Ён кажа: рычыш, тыпу, сучонак? Правільна! Пасля гэтага ён галавой мяне аб сцяну ўдарыў і сказаў, што тыпу калі праз 20 хвілін я не прызнаю, то мяне па крузе пусцяць. Я так нічога і не сказаў, і адвезлі ў ІЧУ ў Акрэсціна», — расказаў Лысаў.
Абвінавачанне пазней перакваліфікавалі на артыкул аб знішчэнні маёмасці. У лістападзе 2022 года Лысава прысудзілі да 10 гадоў калоніі ўзмоцненага рэжыму. У снежні 2023 года яго экстрадавалі ў Расію. Лысаў трапіў у калонію ў Чабаксарах. У Расіі яго судзілі па новай крымінальнай справе. Пасля прысуду ён падпісаў кантракт з расійскім Мінабароны і паехаў ваяваць ва Украіну. Пасля ранення ён дэзерціраваў і ў лютым 2026 года дабраўся да Ерэвана.
