Ганна Канапацкая, якую рэжым Аляксандра Лукашэнкі выкарыстоўвае для стварэння бачнасці апазіцыі ў Беларусі, пахвалілася тым, што яе ўсё ж запрасілі на Усебеларускі народны сход.
«Трэба аддаць належнае арганізатарам УНС: хоць і з пэўным спазненнем, але ўсё ж палічылі патрэбным і мэтазгодным запрасіць канструктыўную апазіцыю на мерапрыемства. Значыць, гатовыя і крытыку выслухаць, і складаныя пытанні падняць і абмеркаваць», — напісала яна ў сваім блогу ў Facebook.
Псеўдаапазіцыянерка паабяцала не рыхтавацца, а «размаўляць з ліста». Пры гэтым назвала сябе «дзейным палітыкам».
«Часу на падрыхтоўку мала, таму раскідацца асацыятыўнымі канструкцыямі і глыбокадумнымі “ізмамі” мне не прыйдзецца. Буду размаўляць “з ліста”, што, безумоўна, яшчэ адзін прафесійны выклік для мяне як для дзейнага палітыка», — заявіла Канапацкая.
У тым самым паведамленні яна абвінаваціла Віктара Бабарыку і Марыю Калеснікаву ў працы на Маскву.
Раней яна ў сваім блогу скардзілася, што яе не запрасілі на УНС, тлумачачы гэта «рэўнасцю».
За апошнія месяцы Канапацкая паспела публічна раскрытыкаваць былую кіраўніцу ЦВК Лідзію Ярмошыну, заявіць, што хоча стаць паручыцелькай у справе вызвалення Анджэя Пачобута, пабыць на сустрэчы Лукашэнкі з ідэалагічным актывам, а таксама ўвайсці ў склад так званай камісіі па «вяртанні».
