Гродзенская пракуратура ўзбудзіла крымінальную справу ў дачыненні да службовых асоб дабрачыннага фонду «Цудо дзецям». Ім інкрымінуецца махлярства ў асабліва буйным памеры.
Паводле версіі пракуратуры, замежныя грамадзяне, з’яўляючыся заснавальнікамі, дырэктарам і намеснікам дырэктара фонду з чэрвеня 2024 года па красавік 2025 года завалодалі грашовымі сродкамі ў памеры не менш за 390 тыс. рублёў.
“Вядома, што збор грашовых сродкаў, ахвяраванняў, ажыццяўляўся валанцёрамі на цэнтральных вуліцах абласных цэнтраў: Гродна, Брэста, Віцебска і Гомеля.
У кожным абласным цэнтры працавала ад 20 да 50 валанцёраў, якія не ведалі пра злачынныя схемы арганізатараў фонду і крадзеж імі грашовых сродкаў і былі перакананыя, што ўсе ахвяраванні ішлі на дапамогу тым, у каго патрэба, і хворым дзецям. Грашовыя сродкі збіраліся наяўнымі і праз папаўненне разліковага рахунку фонду пры дапамозе банкаўскай карты ахвярадаўцы.
У большасці выпадкаў сабраныя сродкі не ішлі на ажыццяўленне дабрачыннай дапамогі, а траціліся на асабістыя патрэбы падазраваных”, — расказалі ў пракуратуры.
Адзін з падазраваных затрыманы. Астатнія знаходзяцца за мяжой.