Палітзняволеная Аляксандра Каско перанесла аперацыю падчас адбывання тэрміну ў папраўчай калоніі №4. Пра гэта са спасылкай на крыніцу паведамляе Mayday.Team.
Паводле яго слоў, у апошнія паўгода Аляксандра сутыкнулася з сур’ёзнымі праблемамі са здароўем. У дзяўчыны выявілі кісту на яечніку. Адміністрацыя калоніі спачатку не рэагавала на сітуацыю, аднак калі кіста разарвалася, Каско перавялі ў бальніцу, дзе правялі аперацыю. У цяперашні час яна зноў адбывае тэрмін у ІК-4.
Аляксандра Каско — медык з Ваўкавыска, была затрыманая 9 лютага 2023 года, калі яна прыехала ў Беларусь з Польшчы. Пасля адміністрацыйнага арышту супраць яе ўзбудзілі крымінальную справу па васьмі артыкулах, уключаючы ўдзел у «экстрэмісцкім фарміраванні», садзейнічанне «экстрэмісцкай дзейнасці» і абразу Лукашэнкі. 19 снежня 2023 года суд прыгаварыў яе да 10 гадоў пазбаўлення волі.
Пазней супраць Каско былі ўзбуджаны яшчэ дзве крымінальныя справы — у канцы мая 2024 года і вясной 2025 года. Прысуды па іх невядомыя.
