Супрацоўнікі Надбужанскага аддзела Памежнай службы Польшчы канфіскавалі легкавы аўтамабіль Toyota коштам каля 180 тысяч злотых (больш за 50 тысяч долараў).
Як паведамілі ў прэс-службе ведамства, інцыдэнт адбыўся на аўтамабільным пункце пропуску «Тэрэспаль» пры выездзе з Польшчы ў Беларусь. Памежнікі спынілі 30-гадовага грамадзяніна Літвы, які спрабаваў перасекчы мяжу на аўтамабілі Toyota 2022 года выпуску.
У ходзе памежнага кантролю было ўстаноўлена ўмяшанне ў ідэнтыфікацыйны нумар VIN. Акрамя таго, высветлілася, што на аўтамабілі былі ўсталяваныя падробленыя рэгістрацыйныя знакі, а вадзіцель карыстаўся фальшывым пасведчаннем аб рэгістрацыі транспартнага сродку.
Папярэдні кошт канфіскаванага аўтамабіля ацэньваецца ў 180 тысяч злотых. Па дадзеным факце распачата дасудовае разбіральніцтва. Вадзіцеля і аўтамабіль перадалі для далейшых працэсуальных дзеянняў супрацоўнікам паліцыі Тэрэспаля.
У Памежнай службе таксама паведамілі, што з пачатку года супрацоўнікі Надбужанскага аддзела ўжо выявілі 9 аўтамабіляў агульным коштам амаль 2 млн злотых.
