Беларуская чыгунка ў 2026 годзе плануе набыць 30 новых пасажырскіх і 100 грузавых вагонаў. Першыя 15 пасажырскіх вагонаў, як чакаецца, паступяць да 1 верасня і будуць выкарыстоўвацца на маршруце Мінск — Масква. Пра гэта паведаміў начальнік БЧ Валерый Вярэніч, піша БелТА.
«Паводле ацэнкі завода-вытворцы, да 1 верасня першая партыя — 15 пасажырскіх вагонаў — будзе пастаўлена для курсіравання ў напрамку Мінск — Масква», — расказаў ён.
Паводле яго слоў, новыя пасажырскія вагоны адпавядаюць сучасным патрабаванням камфорту і бяспекі, а таксама абсталяваныя дадатковымі сэрвісамі для зручнасці пасажыраў.
Ён адзначыў, што існы парк грузавых вагонаў дазваляе цалкам забяспечваць патрэбы як унутраных, так і міжнародных грузаперавозак.
Адначасова працягваецца мадэрнізацыя чыгуначнай інфраструктуры. Вядуцца работы па рамонце верхняй будовы пуці, прылад сігналізацыі, цэнтралізацыі і блакіроўкі, а таксама абнаўленні сістэм сувязі з укараненнем новых тэхналогій перадачы інфармацыі.
З пачатку года Беларуская чыгунка перавезла каля 28 млн пасажыраў. Амаль 45% з іх набылі білеты з выкарыстаннем лічбавых сэрвісаў — праз мабільную праграму і тэрміналы самаабслугоўвання.
Сярод ключавых праектаў называецца запуск 2 красавіка прыгранічнага чыгуначнага паведамлення паміж Беларуссю і Расіяй. У кампаніі заявілі, што працягваюць працу над пашырэннем сеткі такіх маршрутаў, уключаючы напрамкі Смаленск — Орша — Віцебск, а таксама магчымае паведамленне Магілёва і Гомеля з суседнімі расійскімі рэгіёнамі.
